Naxçıvan Muxtar Respublikası Məhkəmə Tibbi Ekspertizası və Patoloji Anatomiya Birliyinin bir qrup işçisi tutduğu vəzifədən azad edilmişdir

2023-07-24 / 12:16:39

Naxçıvan Muxtar Respublikası Səhiyyə Nazirliyi tərəfindən əhaliyə yüksək səviyyəli tibbi xidmət göstərmək və səhiyyənin inkişafı istiqamətində davamlı islahatlar aparılmaqdadır. Həmin islahatlar içərisində qanun pozuntusuna yol vermiş tibb işçiləri haqqında qanunauyğun olaraq tədbirlərin aparılması davam edir. Son zamanlar muxtar respublika səhiyyə sistemində bir sıra qanun pozuntuları aşkarlanıb. Mövcud qanun pozuntularına yol vermiş vəzifəli şəxslərin əməlinə hüquqi qiymət verilməsi məqsədilə bir sıra sənədlər araşdırılaraq əsaslı faktlarla birlikdə Naxçıvan Muxtar Respublika Prokurorluğuna göndərilib.

Növbəti islahata uyğun olaraq Naxçıvan Muxtar Respublikası Məhkəmə Tibbi Ekspertizası və Patoloji Anatomiya Birliyində Naxçıvan Muxtar Respublikası Səhiyyə Nazirliyinin əməkdaşları tərəfindən yoxlamalar aparılmış və bir çox qanun pozuntuları aşkar edilmişdir. Aparılan araşdırmaya əsasən məlum olmuşdur ki, Məhkəmə Tibbi Ekspertizası və Patoloji Anatomiya Birliyinin kompüter operatoru Birliyin digər bir qrup işçisi ilə birgə müəssisədə müəyyən maraqlar əsasında müəssisənin normal iş rejimini pozmuş, təsirində saxladığı şəxslərlə birlikdə Birliyin həkim və digər işçilərinə qarşı fiziki, psixoloji təzyiqlər göstərərək cinayət xarakterli əməllərə yol vermişdir.

Həmin işçilərin cinayət xarakterli əməllərinə hüquqi qiymət verilməsi üçün aidiyyəti sənədlər Naxçıvan Muxtar Respublikası Prokurorluğuna göndərilmişdir.

Bütün bu faktlar nəzərə alınaraq, Naxçıvan Muxtar Respublikası səhiyyə nazirinin birinci müavini, nazir vəzifələrini müvəqqəti icra edən Samiq Sadıxovun müvafiq əmri ilə sözügedən şəxslər tutduğu vəzifədən azad edilmişdir.

Naxçıvan Muxtar Respublikası Səhiyyə Nazirliyi tərəfindən bundan sonra da  əhaliyə göstərilən tibbi xidmətin keyfiyyətinin artırılması məqsədilə muxtar respublika səhiyyəsində nöqsanlara yol verən şəxslərə qarşı sərt tədbirlərin görülməsi davam etdiriləcək, qanunazidd əməllər törədənlərin hüquqi qiyməti veriləcəkdir.

Ömrünü xalqımızın tərəqqisi, yüksəlişi və inkişafına həsr etmiş ümummilli lider Heydər Əliyev bütün sahələrdə olduğu kimi, səhiyyənin inkişafında da misilsiz xidmətlər göstərib, xalqın sağlamlıq məsələlərinə prioritet istiqamətlərdən biri kimi baxıb