Ürək-damar xəstələri isti havalarda daha diqqətli olmalıdır

2023-06-24 / 15:50:30

Yaz-yay aylarında, xüsusilə, havanın temperaturunun yüksək olduğu günlərdə bəzi meteohəssas insanların səhhətlərində problemlər yaranır. Ürək-damar xəstəliklərindən əziyyət çəkən şəxslər isə isti havalarda daha diqqətli olmalıdır.

Bunu Tibbi Ərazi Bölmələrini İdarəetmə Birliyinin tabeliyində fəaliyyət göstərən Kliniki Tibbi Mərkəzin həkim-kardioloqu Sevil Hüseynova deyib. O, qeyd edib ki, ardıcıl olaraq günlərlə davam edən isti hava meteohəssas insanlar üçün təhlükəlidir: “Xüsusilə, yaşı 50-dən yuxarı olan insanlara, tütün məhsullarından istifadə edənlərə, artıq çəki və piylənmədən əziyyət çəkənlərə, şəkərli diabet və ürək-damar sistemi xəstəlikləri olanlara daha çox təsir edir. İsti havada damarlar genişlənir, ürək döyüntüsü artır, qan qatılaşır, damarlarda tromblar əmələ gəlməsi riski artır. Yüksək hərarətdə istənilən fiziki aktivlik, hətta piyada gəzmək belə tərləməni və su itkisini artırır. Həmin su ilə birgə lazımi mikroelementlər, minerallar, kalium, natrium da yuyulub gedir. Bunlar isə ürəyin normal işləməsi üçün çox lazımdır. Nəticədə qan dövranının miqdarı azalır, nəbz yüksəlir, taxikardiya başlayır. Bütün bunlar ürək tutması, insult, infarkt riskini xeyli artırır”.

Həkimin sözlərinə görə, bu cür narahatlıqların ortaya çıxmaması üçün bəzi məqamlara diqqət yetirmək lazımdır: “Bunların qarşısını almaq üçün günəşin ən qızmar vaxtlarında açıq havaya çıxmamaq (xüsusilə, saat 12-18 arası), gün ərzində çoxlu su içmək (qazlı, şirin su içmək olmaz, çox isti çay da məsləhət deyil), yağlı, duzlu və ətli yeməklərdən uzaq durmaq, spirtli içkilər qəbul etməmək, sintetik parçalardan hazırlanan geyimlərdən istifadə etməmək məsləhətdir, başda günəşdən qoruyan papaq və ya çətirlə gəzmək lazımdır”.

S.Hüseynova bildirib ki, bu cür havalarda qidalanmaya da diqqət yetirmək lazımdır: “Yeməklərdən meyvə-tərəvəzlərə, süd məhsullarına, quş ətinə üstünlük verilməlidir. Ürək-damar sisteminə müsbət təsir edən ərzaqlardan pomidor, cəfəri, moruq, qara və qırmızı üzüm, ağartı məhsulları, kətan toxumunu qeyd etmək olar. Ürək-damar, şəkər xəstəliyindən əziyyət çəkənlər dərmanlarını vaxtlı-vaxtında qəbul etməli, uzaq yola çıxdıqda isə mütləq özləri ilə götürməlidirlər. Bu sadə məqamlara əməl edərək sağlamlığınızın qayğısına qalın və qoruyun”.

Ömrünü xalqımızın tərəqqisi, yüksəlişi və inkişafına həsr etmiş ümummilli lider Heydər Əliyev bütün sahələrdə olduğu kimi, səhiyyənin inkişafında da misilsiz xidmətlər göstərib, xalqın sağlamlıq məsələlərinə prioritet istiqamətlərdən biri kimi baxıb