Akademik, oftalmoloq alim Zərifə xanım Əliyevanın anadan olmasının 100 illik yubileyi ilə əlaqədar Naxçıvan Tibb Kollecində tədbir keçirilib.
Tədbirdə çıxış edən Naxçıvan Tibb Kollecinin direktoru Sona Məmmədova görkəmli alim, akademik Zərifə xanım Əliyevanın həyat və fəaliyyəti haqqında çıxış edərək bildirib ki, Azərbaycan tibb elminin inkişafına böyük töhfə verən akademikin həyat fəlsəfəsi, mənəvi dünyası, oftolmologiya elminin inkişafındakı xidmətləri zəngin və çoxşaxəlidir. Zərifə xanım bir həkim, alim və vətəndaş kimi bütün ömrü boyu xalqı üçün çalışıb və onun adı bu gün də Azərbaycanda fəxrlə, sonsuz qürur hissi ilə səslənir. Zərifə xanım Əliyeva ciddi elmi-tədqiqat işləri mürəkkəb cərrahiyyə əməliyyatları, müalicəvi işlərlə yanaşı, geniş diapazonlu pedaqoji fəaliyyətini də uğurla davam etdirirdi. Görkəmli alim 1967-ci ildə müsabiqə yolu ilə Əziz Əliyev adına Azərbaycan Dövlət Həkimləri Təkmilləşdirmə İnstitutunun Göz xəstəlikləri kafedrasının dosenti vəzifəsinə seçilmişdi. Zərifə xanım bu İnstitutda dosentlikdən professor, kafedra müdiri vəzifələrinə, akademik zirvələrinə qədər yüksəlmişdir. 1977-ci ildə Bakıda professor Zərifə Əliyevanın təşəbbüsü ilə Ümumittifaq Oftalmoloqlar Cəmiyyəti İdarə Heyətinin plenumu keçirilmişdir. Bu plenum alimin daha bir keyfiyyətinin qabarıq surətdə üzə çıxmasına imkan yaratdı. Tədbirin gözlənildiyindən də yüksək səviyyədə keçirilməsi Zərifə xanım Əliyevanın təşkilatçılıq bacarığının təzahürünə çevrildi. Bakıda ilk dəfə olaraq belə bir ittifaq miqyaslı plenumun keçirilməsi Azərbaycanda Oftalmologiya elminin yeni inkişaf mərhələsinə qədəm qoymasına güclü təkan verdi. Professor Oftalmologiya elminin inkişafı yolunda əldə etdiyi nailiyyətlərə görmə orqanının peşə patologiyası sahəsində apardığı uğurlu elmi-tədqiqat işlərinə görə 1981-ci ildə SSRİ Tibb Elmləri Akademiyasının akademik M.Averbax adına mükafatına layiq görülmüşdür.
Sonra Naxçıvan Muxtar Respublikası Səhiyyə Nazirliyinin aparıcı məsləhətçisi Xavər Babayeva “Bir ömrün səhifələri”mövzusunda çıxış edərək bildirib ki, gözəl ana, vəfalı ömür-gün yoldaşı, intellektual keyfiyyətləri özündə birləşdirən ziyalı, dünya tibb elminə əvəzolunmaz töhfələr vermiş böyük oftalmoloq alim Zərifə xanım Əliyevanın həyatı, elmi və yaradıcılıq fəaliyyəti ilə daha yaxından tanış olduqca, haqqında xatirələri oxuduqca yaddaşımızda Ulu Tanrının bu ən yüksək mənəvi xüsusiyyətlərini bəxş etdiyi böyük insanın obrazı canlanır, gözlərimiz önündə onun portreti yaranır. Zərifə xanım Əliyevanın həyat fəlsəfəsi, mənəvi dünyası, oftalmologiya elminin inkişafındakı xidmətləri o qədər zəngin və çoxcəhətlidir ki, Onun fəaliyyətinə nəzər salarkən, bu dahi insanın genişmiqyaslı şəxsiyyət olması qənaətinə gəlmək olur. Zərifə xanımın fitri istedada malik novator alim, pak və nadir bir insan kimi yaşadığı dərin mənalı ömrü, keçdiyi şərəfli həyat yolu hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik və müdriklik məktəbidir. Onun elmi, tibbi və pedaqoji fəaliyyəti, hər kəs üçün örnək olan yüksək mənəvi keyfiyyətləri haqqında çoxsaylı məqalə, kitab və əsərlər yazılıb və yazılacaqdır. Zərifə xanım Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifəsidir.
Tədbir Zərifə xanım Əliyeva adına Naxçıvan Şəhər Poliklinikası publik hüquqi şəxsin həkim-terapevti Nigar Səfərovanın “Akademik Zərifə xanım Əliyevanın Azərbaycan oftalmologiyasının inkişafında rolu”, Naxçıvan Tibb Kollecinin müəllimi Lalə Talıbovanın “Akademik Zərifə xanım Əliyevanın peşəsi və işıqlı təbiəti” və Naxçıvan Tibb Kollecinin tələbəsi Sevgi Nurəliyevanın Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən keçirilən esse müsabiqəsində qalib olduğu “Azərbaycan qadını, anası, həkimi - Akademik Zərifə xanım Əliyeva” mövzusu ilə davam edib.
Tədbirin sonunda görkəmli alim Zərifə xanım Əliyevanın həyat və fəaliyyətini əks etdirən videoçarx nümayiş olunub.
Naxçıvan Muxtar Respublikası
Səhiyyə Nazirliyinin mətbuat xidməti