Hami təşkilat ilə təhsil müəssisələri arasında uğurlu əməkdaşlıq

2019-05-10 / 12:17:31

   Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” Sərəncamının icrası ilə əlaqədar “İdeyadan başlanğıca” devizi altında        növbəti       tədbir keçirilib.

    Naxçıvan Muxtar Respublikası Səhiyyə Nazirliyi ilə birgə keçirilən tədbiri Naxçıvan Dövlət Universitetinin rektoru,  AMEA-nın müxbir üzvü Saleh Məhərrəmov açaraq sərəncamın əhəmiyyətindən, hami təşkilatlar və təhsil müəssisələri arasında əlaqələrin genişlənməsindən, hamiliklə bağlı görülən işlərdən və qarşıda duran vəzifələrdən danışıb. Keçirilən təlimlərin əhəmiyyətini        vurğulayıb.
   Naxçıvan Muxtar Respublikası Səhiyyə naziri Niyazi Novruzov  bildirib ki,Naxçıvan Muxtar Respublikası Ali Məclis Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamına uyğun olaraq Naxçıvan Dövlət Universitetinin Tibb fakültəsi və Tibb Kolleci Naxçıvan Muxtar Respublikasının Səhiyyə Nazirliyinə hamiliyə verilib. Həmin dövrdən Naxçıvan Muxtar Respublikası Səhiyyə Nazirliyi ilə bu təhsil müəssisələri arasında əlaqələr daha da genişlənib, yüksək hazırlıqlı kadrların hazırlanması üçün lazımi işlər görülüb.

  Ali Məclis Sədrinin müvafiq Sərəncamlarında verilmiş tapşırıqlara uyğun olaraq Naxçıvan Dövlət Universitetinin Tibb fakültəsi və Tibb Kolleci tələbələrinin, həkim-rezidentlərinin tibb müəssisələrində təhsil və praktik təcrübələrin mənimsənilməsi və daha da inkişaf etdirilməsi üçün həkim rezidentlərin əksəriyyəti işlə təmin edilib, tələbələrə qrafik əsasında növbələrə salınmaqla sərbəst işləmələri təmin olunub. Nazirlikdə tələbələr tərəfindən veriləcək layihələrin dəyərləndirilməsi üçün ekspert qrupu yaradılıb. Səhiyyə müəssisələrində keçirilən çoxsaylı seminar və konfranslarda tələbə və həkim rezidentlərin iştirakı və çıxışları, həmçinin onların Türkiyə Respublikası və Bakı şəhərində müxtəlif klinikalarda kurslara göndərilməsi ardıcıl xarakter alıb. Naxçıvan Muxtar Respublika Xəstəxanasında “Auditoriyadan xəstəxanaya” devizi altında laporoskopik əməliyyatların birbaşa auditoriyalara verilməsi işi təşkil edilib. Açıq əməliyyatların isə auditoriyalara və onlayn olaraq Naxçıvan Dövlət Universitetinin Tibb fakültəsi və Tibb Kolleci auditoriyalarına verilməsi üçün hazırlıq işləri aparılır. Məqsəd qabaqcıl texnologiyalarla daha da yüksək səviyyədə işləməyi bacaran, innovasiyalardan xəbərdar olan, yaradıcı düşüncəli kadrlar  yetişdirməkdir.

       Nazir Ali Məclis Sədrinin rəhbərliyi ilə bütün sahələrdə olduğu kimi səhiyyədə də görülən genişmiqyaslı işlərdən danışıb, müvafiq sərəncamlarının icrası məqsədilə tələbələrin daha da yüksək səviyyədə bilik qazanmaları üçün işlərin ardıcıl şəkildə davam  etdiriləcəyini bildirib.

      Sonra  Naxçıvan Tibb Kollecinin direktoru Sona Məmmədova, Naxçıvan Muxtar Respublikası Səhiyyə Nazirliyinin Kadr, elm və təhsil sektorunun müdiri  Səmayə İbrahimova, Naxçıvan Dövlət Universitetinin Tibb fakültəsinin dekanı Elsevər Əsədov çıxış edərək muxtar respublikada investisiya mühitini yaxşılaşdırmaq, innovasiyaya və dayanıqlı inkişafa əsaslanan düşüncəni və elmi-texniki  tərəqqinin əks etdirən yeni layihələrin(startapların) həyata keçirilməsinə yardımçı olmaq, “İdeyadan biznesə” layihəsini irəli sürən startap müəllifləri ilə işin təşkilini və icrasını təmin etmək üçün görülən işlərdən və qarşıda duran vəzifələrdən danışıblar.

        Axırda müzakirələr aparılıb, suallar cavablandırılıb.

        Naxçıvan Muxtar Respublikası Səhiyyə Nazirliyinin mətbuat xidməti

Ömrünü xalqımızın tərəqqisi, yüksəlişi və inkişafına həsr etmiş ümummilli lider Heydər Əliyev bütün sahələrdə olduğu kimi, səhiyyənin inkişafında da misilsiz xidmətlər göstərib, xalqın sağlamlıq məsələlərinə prioritet istiqamətlərdən biri kimi baxıb